ManuelF. Rodríguez
Manuel F. Rodríguez naceu en Sarria en 1958 e reside no concello coruñés de Teo.
É licenciado en Ciencias da Información pola Universidade Complutense de Madrid e doutor en Comunicación Audiovisual pola Universidade de Santiago de Compostela (USC). Na USC foi profesor asociado de Radio e Teoría da Comunicación entre 2001 e 2012. Tamén traballou en prensa e radio en Madrid e Galicia (El Progreso, La Voz de Galicia, Cope) e, como técnico cultural, na Administración autonómica galega durante trinta anos, labor no que se xubilou en 2024. Durante a súa etapa na USC propuxo e organizou, entre 2008 e 2011, as dúas primeiras exposicións sobre a historia da radio en Galicia, traballo que se recolleu en 2010 no libro colectivo, por el coordinado, Galicia pola radio. A historia falada (1933-2008).
Como resultado do seu interese desde a adolescencia polo progresivo renacer do Camiño de Santiago, que cruzaba xusto polas terras sarriás nas que se criou, peregrinou a pé desde Sarria a Santiago en 1976, con 17 anos. Posteriormente, realizou tamén a pé diversas rutas do Camiño, sempre desde unha consideración persoal non relixiosa, e dedicouse ao seu estudo e divulgación, o que o levou a impartir conferencias en encontros internacionais e de asociacións de Amigos do Camiño en países de Europa, América e Asia.
En materia xacobea leva publicados uns trescentos artigos en varios idiomas en libros, revistas especializadas e xornais de España e outros países. Tamén escribiu libros ao respecto, xa fose a título persoal ou en colaboración, entre eles, Os Camiños de Santiago en Galicia, Xunta de Galicia, 2004; Os anos santos composteláns do século XX: unha mirada desde os xornais santiagueses, Asociación de Periodistas de Estudosos do Camiño de Santiago, 2004; A catedral oculta. Os ritos dos peregrinos en Santiago, Bolanda, 2012; A Coruña, o porto do Camiño de Santiago, Concello da Coruña-Deputación da Coruña, 2017; Cronología jacobea. Una visión de conjunto de las peregrinaciones a Santiago, Xunta de Galicia, 2023, etc.
Foi tamén o autor da idea, selección de entradas, redactor principal e director de La Gran Enciclopedia del Camino de Santiago: diccionario de la cultura jacobea, Bolanda, 2010, obra en 18 tomos, con tres mil entradas, e distribuída por xornais de Galicia e doutras comunidade autónomas. Actualmente esta obra, sen traducir ao galego, en contra do proposto no seu día, e sen actualizar e ampliar en ningún sentido, é de acceso libre en internet como Xacopedia.com, con milleiros de consultas diarias. Por todo este labor, Manuel F. Rodríguez recibiu premios e recoñecementos en Galicia, España e a nivel internacional, entre eles, en 2019, o Premio Internacional Aymeric Picaud, concedido polas asociacións de Prensa do norte de España.
Manuel F. Rodríguez forma parte de entidades de estudo e de defensa do Camiño de Santiago. Entre outras, é asesor científico en materia xacobea da Universidade da Coruña e membro do consello de redacción da revista Peregrino, da Federación Española de Asociacións de Amigos do Camiño. Tamén foi asesor durante dez anos do Arquivo Sonoro de Galicia, do Consello da Cultura Galega.
Como creador literario, escribiu dúas novelas. A primeira, A viaxe á fin do mundo, Bolanda, 2016, publicada en 2023 en español, co título de El viaje al fin del mundo. Los buscadores, pola editorial madrileña Evohé, especializada en novela histórica. A segunda, A muller do muro, saíu á rúa en decembro de 2024 na editorial Bolanda.
[Febreiro, 2025]
