Xoán Carlos

García Porral

Doutor en Antropoloxía Social pola USC (Departamento de Filosofía e Antropoloxía Social), Mestrado en Técnicas de Xestión Integral do Patrimonio Cultural polo CSIC e a USC, e Mestrado en Servizos Culturais pola USC (Facultade de Humanidades). É vicedirector e profesor no IES Plurilingüe Pintor Colmeiro de Silleda.

A súa actividade investigadora, antropolóxica e etnográfica, céntrase no estudo do mundo rural e na difusión do patrimonio cultural da Comarca de Deza.

Arredor dela leva impartidas medio cento de charlas sobre os cambios sociais no rural, o patrimonio material e inmaterial castrexo e a microtoponimia en colexios, institutos, centros de formación do profesorado e congresos.

Froito deste labor investigador son os libros:

• GOIÁS, VIDA DUNHA PARROQUIA RURAL GALEGA (Seminario de Estudios de Deza, 2002)
• REALIDADE ECLESIÁSTICA DO CONCELLO DE LALÍN NA ÉPOCA POSTRIDENTINA (Seminario de Estudios de Deza, 2006, en coautoría con Óscar González Murado)
• MODERNIZACIÓN RURAL E TRADICIÓN CULTURAL (tese de doutoramento; Lóstrego, 2008)
• LENDAS CASTREXAS. ANTROPOLOXÍA DA TRADICIÓN ORAL NO CONCELLO DE LALÍN (Lóstrego, 2010)
• DE BALBINO A HOXE. CAMBIOS E TRANSFORMACIÓNS NA ALDEA (Lóstrego, 2012)
• O MUNDO DOS CASTROS. A COMARCA DE DEZA (Faro de Vigo, 2014, en coautoría con Antonio Presas García)
• O ÚLTIMO CASEIRO (Fervenza, 2017)
• DE MOUROS, MOURAS E TESOUROS. A COMARCA DE DEZA (Fervenza, 2017) (co mapa web: lendasdamourindadedeza)
• AS TRES MOURAS DA FONTE LANTANA (Fervenza, 2019)
• A MATANZA DO PORCO. CULTURA E TRADICIÓN (Fervenza, 2020)
• FONDO RURAL. IDENTIDADE SOCIAL E ESTRUTURA FAMILIAR (Fervenza, 2021)
• RESISTIR. MINIFUNDIO E POLICULTURA. RETORNO A UNHA ECONOMÍA FAMILIAR SOSTIBLE (FoCuCu, 2023)
• ANTÓN E A MOURA DO LAMEIRO DE VIANA (Fervenza, 2023)
• NACER NO RURAL (FoCuCu, 2024)
• O TESOURO DO CASTRO DA VEIGA (Fervenza, 2024)
• A VILA DE GAUDILA. A TOPONIMIA COMO MEMORIA POPULAR E IDENTIDADE CULTURAL (Autoedición, 2024)

Para a cativada publicou na serie Os Balbinos, en coautoría con Toño Núñez e Gabriel Iglesias, os seguintes libros:

• OS BALBINOS. CAMIÑO FRANCÉS (Fervenza, 2020)
• OS BALBINOS. RUTA DA PRATA (Fervenza, 2020)
• OS BALBINOS. CAMIÑO INGLÉS (Fervenza, 2021)
• OS BALBINOS. CAMIÑO PORTUGUÉS (Fervenza, 2021)
• OS BALBINOS VISITAN SILLEDA (Fervenza, 2023)
• OS BALBINOS VISITAN MUSEOS DE GALICIA (Fervenza, 2024)
• OS BALBINOS VISITAN PAZOS DE GALICIA (Fervenza, 2025)
• A LÚA E A BAL GÚSTALLES A MÚSICA (Fervenza, 2025)

Foi coordinador do estudo RODEIRO, UNHA TERRA CON HISTORIA, (Deputación de Pontevedra, 2008), do proxecto do IES Pintor Colmeiro A PAISAXE LENDARIA E TOPONÍMICA DO CONCELLO DE SILLEDA (gañador do IX Proxecto Didáctico Antonio Fraguas do Museo do Pobo Galego, 2014-15), e do libro LAMELA, NO CAMIÑO DE PEREGRINACIÓN A COMPOSTELA (Fervenza, 2023). E participou no libro biográfico DON NICANDRO ARES. BO E SABIO (Vozesnavoz Edicións, 2020).

Tamén ten publicado artigos (arredor de tres ducias) de temática histórico-antropolóxica nas revistas Descubrindo, A trabe de ouro, Lucensia, A Estrada-Miscelánea Histórica e Cultural, e nos Estudos de Onomástica Galega da RAG, ademais de ser colaborador no xornal Faro de Vigo con artigos sobre a Comarca de Deza, e no proxecto de recompilación de toponimia GALICIA NOMEADA, dependente da Real Academia Galega e da Xunta de Galicia.

É membro da Asociación Galega de Antropoloxía (AGANTRO), e da Asociación de Escritoras e Escritores en Lingua Galega (AELG).

[Novembro, 2025]