Teoría do coñecemento -
17.
Vaqueiro, Vítor
v2vitorvaqueiroteoriaconecemento005.html
| 17 |
Na caverna
xurdían nocións incomprensíbeis como excéntricos
paxaros submariños, como estraños mamíferos asiáticos
alados ou como profecías de imposíbel cumprimento
(invocación, pregaria, profecía constitúen parapeitos
limiares do coñecemento). Home, muller, hermafrodita,
andróxino ollaban, estantíos, a pasaxe (nas tebras) das
ideas incógnitas que o lampo intermitente alumeaba,
provocando a cegueira e a luz alternativa da conciencia.
Na caverna xurdían nocións contraditorias
(contraditorio: o que vai contra o dito) que loitaban a
morte nas paredes suorentas, poboadas pola arxila e o
fungo, mentres seres inequivocamente antropomórficos
axeitaban as mentes para a estrita lembranza do vindeiro
que xa se deseñaba na caverna. |
