Sabiam bem que o seu
-se havia qualquer cousa que pudesse ser nomeada como
o seu-
era na prática
impossível
Nem táctica nem estrategicamente
existia aquilo que ambos os dous reconheciam
instintivamente
como o seu
Ela era eminentemente lírica
e ele obsessivamente prosaico
Ele substantivizava acçons
e ela nom fazia mais que adjectivar sentimentos
Ela na procura incessante de umha cálida sensaçom
e ele sempre a fugir de qualquer indício de doçura
Porém
conseguiram
nas escassas ocassions em que coincidiam
no tempo e no espaço
caminhar juntos sem tropeçarem
e mesmo podiam estar vários segundos
e até minutos
diante de uns cafés ou umhas cervejas
sem falar
em silêncio
A evitar cuidadosamente as inecessárias palavras
Sabiam bem
que umha mínima parte do outro
era cousa sua
e que a soma de tudo isso
era aquilo que
inexplicavelmente
dotava de conteúdo o seu
-se havia qualquer cousa que pudesse ser nomeada como
o seu-
Sei que existem multidom de cousas
que nunca jamais serei quem de fazer
Mas sentiria
profundamente
ter vivido sem escalar a face norte da existência
ou sem ter feito o caminho a mao e sem permisso
Por isso sempre
nas reunions dos organismos de direcçom
voto a favor de que o universo seja infinito
e de que polas manhás tenhamos água quente
no quarto do hotel
Doíam-me tanto as costas
depois de seis horas
seis dias seguidos
a arrancar ervas de parterres
pinçando cóleos
e a remover com um pequeno sacho a terra
para que detrás vinhesse alguém
e pudesse plantar umha nova espécie
doíam-me tanto
dizia
que nom reparei
em que quando eu olhava
levantando os olhos da terra
tu nom passavas por diante de mim
Aquela camareira
que servia cafés donuts e croissants
no balcom da cafetaria da estaçom dos autocarros
de seis a três e de três e meia a oito
escrevia clandestinamente
em fólios cheios de graxa
pequenos versos de amor
que ninguém conhecia
entre cocacola e cocacola
entre sandes de tortilha e copas de conhaque
sabendo que no final do mês continuaria a se igual de inédita
Eu aguardava por ti
sabendo que nom ias vir
que por algum motivo que eu
jamais
poderia conhecer
tu nom ias vir
Mas eu seguia a aguardar
Desde a primeira hora do dia
sentado ante aquele café com leite frio
até o final do dia
mesmo diante de um outro café com leite frio
que anunciava o começo doutro novo dia
em que eu continuaria a aguardar por ti
O mais complicado é reconhecer os erros
os fracassos
Reconhecer Aceitar Assumir
Reciclar Reduzir Reutilizar
Incorporar
Farei a minha achega
com umhas quantas letras
já usadas
que servirám para formar umhas palavras
já pronunciadas
E com elas
aparecerám dous ou três versos
nom mais
Tudo isso será a minha achega
A minha herança
O que poda constar no meu testamento
Usade-as
se pensades que podem ter utilidade
e se nom
arrumade-as por aí
numha caixinha
num quarto escuro
e deixade-as descansar
Procurava umha voz
umha ténue sensaçom de companhia
que pronunciará algumhas palavras próximas
reconhecíveis
tranqüilizadoras
Caminhava as ruas
as cidades
os países
e continuava ainda na sua procura
Caminhava
Caminhava
Caminhava
até que descobrim que quanto mais para lá ia
mais me afastava do que procurava
quigem voltar sobre os meus passos
mas o tempo nom queria vir comigo
e cada dia era um mês
e cada mês era umha década
e cada década era um século
e perdim a esperança
Extraviei-me
Perdim o caminho
E um dia já nom soubem
se era um caranguejo a andar para adiante
ou um caracol numha auto-estrada
Sentei
E continuo aqui
Sentado
Centos de pessoas passam todos os dias por diante dos meus olhos
mas nom olho para elas
Estou aqui sentado
Na procura de umha voz
de umha ténue sensaçom de companhia
que pronuncie algumhas palavras próximas
Confundim-me
ou enganárom-me
Eu queria solicitar um dos postos de músico
Acordeom
guitarra
ou bateria
Tanto me tinha um como outro
Eu nom tenho nem ideia de música
e penso que só umha vez vim um acordeom a menos de 100 metros
Mas pensei que isso teria possibilidades
Possibilidades de fugir
digo
Estar aí
com o acordeom com a guitarra com a bateria
sem chamar a atençom
e em qualquer momento
zás!
Fugir
Escapar
Evadir-me
isso é
Exactamente isso
Evadir-me
Eu escuitara em algum lado que a vida do músico
polo geral
é daquela maneira
já se sabe
mais relaxada
menos rígida
sem tanta vigiláncia e controlo
e pensei que numha dessas
entre notas partituras e semicolcheias
que eu nom sabia nem o que eram
e continuo sem saber
numha dessas
aproveitava eu
e...
A evasom
A escapada
A fugida
Eu por isso queria solicitar um dos postos de músico
Saber
o que se di saber
de música nom sei grande cousa
Mas nom som parvo
e podia aprender
Também aprendim a manejar a vassoira
a esfregar as janelas do quarto andar
que só abrem para fora e ninguém se atrevia
e a levar a roupa à lavandaria
que som o único de toda a minha secçom
a quem lhe deixam levar a roupa à lavandaria
Também podia aprender algo de música
E por isso fum pedir os papéis para solicitar um posto
Mas confundírom-me
ou enganei-me
e preenchim os papéis para o posto de operário jardineiro
E cá estou
sem poder sair destes muros
tam cinzentos
arrancando as ervas más que medram
tam verdes
nos jardins deste centro
tam psiquiátrico
mas mudei de opiniom
e pugem-me com o de declamaçons
Logo vim que era necessário o de exclamaçons
e que nom estaria mal o de escavaçons
Propugem-me um de situaçons
tam interessante
pensei
como o de perturbaçons
E finalmente
quando já me ia decidir polo de insinuaçons
preferim o de deconstruçons
Até dar com o de confusons
repetia a todas as horas
em todas as partes
aquele poeta inédito
licenciado e fanfarrom
que andava na procura das musas
entre as massas
ou das moças
tras os copos de uísque
Gostaria poder dizer Ourense
como quando digo Lisboa
ou Havana
Gostaria poder dizer Ourense
e lembrar
como quando digo Bilbo
ou Barcelona
as digo Ourense
e penso ainda
e nom lembro
porque sinto que respira
que está viva
umha lembrança de futuro
umha sensaçom de utopia
umha possibilidade de
Ao longe
o mundo era preto
ou azul escuro
mas umha clara certeza
inundava as perspectivas
Saber que nunca se poderá recuperar
aquilo que já se perdeu
e se deseja
quer dizer
a nostalgia
Quer dizer
a saudade
Quer dizer
a morrinha
Quer dizer
a certeza de que já nom é possível
voltar à infáncia
Porque viajar no tempo
só é possível para adiante