NON digas

non penses

non poñas adverbios á distancia que nos une

non poñas datas á ausencia

non saibas

non preguntes

non lumbres a nostalgia é cruel

non te afastes

non fuxas

xa sei

debes facelo

o camiño é longo

o paso lento

non escoites

poderían enganarte

no engano agóchase a única verdade

na que nunca cremos

a voz soterrada

o silencio que nos une

a palabra que non permite

que sexamos bilingües nun país de xordomudos.