Chegou unha nova edición das Xornadas de Literatura Infantil e Xuvenil e animación á lectura, neste edición baixo o título de Tecer palabras en tempos de crise.

A actividade tivo lugar o 27 de outubro, entre as 17:00 e as 18:30 horas, a través da Plataforma Teams da Universidade da Coruña, unicamente para o alumnado dos Graos en Educación Infantil e Primaria da Facultade de Ciencias da Educación desta Universidade. As profesoras coordinadoras da actividade foron Montse Muriano Rodríguez, Iria Sobrino Freire e Patricia Carballal Miñán, da Facultade.

O obradoiro-coloquio contou coa presenza de:

- Eva Mejuto: Cultura resistente.

- Elisabeth Rodríguez Rico: A biblioteca en tempos de pandemia.

O día 27 de outubro de 2020 tiveron lugar as III Xornadas de literatura infantil e xuvenil e animación á lectura “Tecer palabras en tempos de crise”, organizadas polas profesoras Montse Muriano Rodríguez, Iria Sobrino Freire e Patricia Carballal Miñán da Facultade de Ciencias da Educación da UDC en colaboración coa Asociación de Escritoras e Escritores en Lingua Galega. Na sesión -esta vez de carácter virtual e seguida por 300 persoas- participaron Eva Mejuto, directora do Salón do Libro, cun relatorio denominado “Cultura resistente” e Elisabeth Rodríguez Rico, das Bibliotecas Municipais da Coruña, quen artellou a súa intervención sobre o tema de “A biblioteca en pandemia”. 

A xornada comezou cunhas palabras introdutorias de Iria Sobrino Freire e de Patricia Carballal Miñán, que destacaron o papel da literatura en tempos de crises colectivas e individuais, respectivamente. Logo, Elisabeth Rodríguez Rico falou de como o persoal das Bibliotecas Municipais da Coruña actuou durante o confinamento do pasado marzo de 2020 para que estes centros,  malia o confinamento e as limitacións impostas,  continuaran o seu labor como espazos democratizadores e como punto de encontro educativo, informativo e de entretemento ao servizo da cidadanía. Deste xeito, falou de diversos programas e accións que tiveron lugar tanto durante o confinamento como nas etapas da nova normalidade: recursos para apoiar a ensinanza-aprendizaxe de alumnos/as profesores/as e familias de maneira telemática; asesoramento sobre as posibilidades de préstamo online e outras dinámicas espalladas a través das redes sociais, ben de carácter lúdico-artístico (recomendacións literarias, audiovisuais e musicais; conta contos, retos literarios e enigmas) ou ben para poñer en contacto ás persoas a través dos libros (clubs de lectura a distancia).

Pola súa banda, Eva Mejuto, reivindicou os libros como bens necesarios para as persoas e falou detalladamente de como O Salón do Libro, na súa edición de 2020, a pesar de ter que clausurar a súa edición presencial aos poucos días de comezar, continuou a súa andadura na rede. Así, un bo número de actividades pasaron a realizarse de xeito virtual e as persoas participantes e organizadoras, reformularon as súas prácticas para poder ofrecerlles aos nenos, nenas, familias e público xeral vídeos, obradoiros de creación literaria, contacontos, ideas para as familias e outras actividades conmemorativas artelladas a partir dos libros e da literatura.

Despois da quenda de impresións e comentarios compartidos entre poñentes docentes e alumnos/as, a xornada rematou cunha reflexión compartida sobre necesidade da cultura como ben primordial das persoas, da súa importancia educativa  e da urxencia de apoiala con políticas públicas e orzamentos adecuados na crise como os que estamos a vivir.