Os Paseos pola Coruña Literaria constitúen unha iniciativa para coñecermos unha cidade diferente da man de diferentes autoras e autores. Todos eles foron ás 12:00 h., cunha duración aproximada de hora e media.

Foron destinados a persoas maiores de 16 anos. Son gratuítos.

Xa tiveron lugar os paseos:

• Sábado 26 de outubro: Dores Tembrás. A Coruña: cartografía con puntos de fuga​.

Este paseo propuxo demorarse nalgunhas interseccións entre pasado e presente nun péndulo que cruza tamén da palabra pública á íntima. A Coruña como territorio fascinado da literatura.

• Sábado 9 de novembro: Tito Pérez. Un paseo polo barrio.

Seguiuse o percorrido do protagonista de O latexar do barrio para comprobar in situ as súas diversas realidades e contrastes. E, como non podía ser doutro xeito, rematouse no mesmiño centro neurálxico do barrio dos barrios galegos.

• Sábado 16 de novembro: María Casar. Sobre o espello do mar e do vento, arredor de Luísa Villalta. Inscrición desde o 4 de novembro.

Roteiro sobre a poeta e os espazos da cidade da Coruña que poetizou nos seus libros En Concreto e Papagaio. Un camiñar pola paisaxe urbana que sae dos versos e sinala o territorio como xerme da creación. A poeta re-constrúe a Cidade como lugar mítico, como espazo de vida e de historia, na que a música enche os baleiros.

• Sábado 30 de novembro: Antonio Sandoval. As naturezas da Torre. Inscrición desde o 18 de novembro.

Percorréronse os campos que rodean a Torre de Hércules para coñecer a súa rica biodiversidade, que motivou a súa declaración como Espazo Natural de Interese Local. Tamén se charlou acerca dalgunhas das súas lendas e, en particular, sobre un poema moi especial, así como sobre a literatura de natureza, un xénero en auxe e cada vez máis necesario. Ademais, escoitáronse o vento, o mar e uns cantos paxaros!