Esta actividade enfócase como continuación dos Cursos de Formación. Os camiños nas narrativas literarias e artísticas da Literatura Infantil e Xuvenil, dado que desde 2020 non se puideron levar a cabo no seu formato habitual anterior.

Está orientada á formación do futuro profesorado de Educación Infantil e Primaria, e a todo tipo de mediador/a, no seu quefacer profesional no marco de ámbitos básicos como son a formación artístico-literaria e a comprensión e expresión escrita e lectora.

Tiveron lugar estes catro encontros:

- O 30 de outubro, de 12:00 a 13:30 horas, no Salón de Actos da Facultade de Ciencias da Educación (Campus Norte) da Universidade de Santiago de Compostela: Aprender as palabras para cambiar o mundo, con Paula Carballeira.

- O 6 de novembro, de 12:30 a 14:00 horas, no Salón de Actos da Facultade de Ciencias da Educación (Campus Norte) da Universidade de Santiago de Compostela: Do falado ao escrito. Literaturas de ida e volta, con Antonio Reigosa.

- O 8 de novembro, de 19:00 a 20:30 horas, no Salón de Actos da Facultade de Formación de Profesorado do Campus de Lugo da Universidade de Santiago de Compostela: Encontro con Antonio Reigosa.

- O 14 de novembro, de 16:00 a 17:30 horas, no Salón de Actos da Facultade de Formación de Profesorado do Campus de Lugo da Universidade de Santiago de Compostela: Encontro con Antía Yáñez Rodríguez.

Na Facultade de Ciencias da Educación (campus norte) de Santiago de Compostela, o encontro coa escritora Paula Carballeira tivo lugar o día 30 de outubro, de 12.00 a 13.30 horas, no salón de actos da facultade, mentres que o encontro co escritor Antonio Reigosa foi o día 6 de novembro de 12.30 a 14.00 horas na aula 1 da facultade, por mor dun problema de espazo de última hora. Baixo o título “Aprender as palabras para cambiar o mundo”, Paula Carballeira falou da importancia da palabra, da importancia de contar e de facer teatro na aula. Así mesmo, deu algúns apuntamentos teóricos de porqué e como facelo, para despois exempli ficar con obras e tamén a través dunha contada. Pola súa parte, Antonio Reigosa centrou a súa intervención “Do falado ao escrito. Literaturas de ida e volta” na importancia de recompilar os materiais de transmisión oral, facendo fincapé na responsabilidade que os futuros e as futuras docentes teñen á hora de salvagardar a lingua galega e os costumes, mitos, lendas, personaxes propios etc. de Galicia. Falouse da súa experiencia e de como se fixo isto nas súas obras.

Na Facultade de Formación de Profesorado, o encontro con Antonio Reigosa tivo lugar o día 8 de novembro de 19.00 a 20.30 horas, mentres que o encontro con Antía Yáñez foi o 14 de novembro de 16.00 a 17.30 horas; ambos os dous leváronse a cabo no Salón de Actos da Facultade. Para o seu desenvolvemento, iniciouse cada encontro cunha serie de preguntas sobre o oficio de escritor, tendo en conta o perfil concreto de cada invitado, para logo ir explorando a súa obra infantil e xuvenil. Deste xeito, non só se presentaban as creacións de maior interese para o futuro profesorado, senón que se profundaba no seu coñecemento e nos aspectos máis salientábeis. Ademais, tamén se lles preguntou por temas de interese: no caso de Reigosa, polo seu labor de divulgación da tradición oral a través da web Galicia Encantada e diversos proxectos que se vinculan con ela; no de Antía, pola súa colaboración na revista Luzes, onde reflexiona sobre temas de actualidade dende unha visión crítica, mais tamén conciliadora e empática. Para acompañar as intervencións, o público asistente recibiu un folleto , a nivel informativo, sobre a persoa invitada e a súa obra. Finalmente, os encontros remataron cunha quenda de preguntas por parte do alumnado.