A AS-PG nace, se por nacer entendermos a súa legalización estatutaria, en 1978, cun lema ben preciso: na procura dun ensino galego. Galego na expresión e galego nos contidos. Mais este nacemento é froito dunha xestación que arranca do século XVIII e se perfila no interese do nacionalismo galego histórico por organizar o sistema escolar galego desde o coñecemento do propio país, e ao seu servizo, cousa que á altura de 1978 aínda non se concretara.

Pasaron trinta anos de historia dignísima de rehabilitación e modernización de nós mesmos, con colectivos e individualidades traballando para podermos estudar con normalidade o que é de noso e o que é de toda a humanidade…, en galego e desde o galego.

Neste contexto non é de estrañar que algunhas das propostas metodolóxicas levadas a cabo por unha boa parte do profesorado ligado á AS-PG tomase como punto de partida a obra literaria das nosas autoras e dos nosos autores, nunha sorte de viaxe que, en síntese, parte do signo literario para nos aproximar á nosa historia, á nosa economía, á nosa xeografía, á nosa arte, etc. tendo sempre presente que, para a xeneralidade do alumnado, a literatura galega vai ser a única peza do espazo simbólico do idioma coñecida: a escrita literaria pasa a ocupar, por metonimia, o espazo da escrita en xeral.