Estes obradoiros foron concibidos como unha oportunidade de achegar á mocidade os nosos autores e autoras e á súa obra, o que fará que coñezan a realidade cultural do país.

A impartición dun total de 30 obradoiros no ensino permitiu que entre 500 e 600 mozos e mozas, pertencentes ás diferentes etapas educativas do ensino obrigatorio e posobrigatorio –primaria, secundaria e bacharelato-, puideran compartir unha experiencia única de descuberta literaria, tendo como guía teórico e práctico un escritor ou escritora destacados de entre o panorama literario en galego actual. E todo isto ao longo de cinco sesións semanais de dúas horas continuadas e para cuxa organización a AELG contou sempre cun/cunha profesional no centro, que actuou como coordinador/a ou responsábel da actividade nese colexio ou instituto.

OBXECTIVOS QUE SE DESENVOLVERON

Crear espazos para contar, escoitar, fabular, inventar, imaxinar...

Fomentar nos máis pequenos o gusto pola lectura, compañeira inseparábel da escrita e fonte da que se nutre, como medio de apreixar o mundo, de coñecelo, de entrar noutras vidas e sentirse reflectido noutras  experiencias.

Espertar o amor polas palabras, pola súa maxia, que reflicten o mundo e alimentan a fantasía, recrean realidades e teñen o poder da transformación.

Coa presenza de autores, transmitir a experiencia, co ser posto en xogo, coa paixón de facer aquilo que non se pode evitar como é o acto de crear, afondando nos motivos que alimentan a súa obra.

Proporcionar estratexias básicas para a escrita, destacando que para escribir hai que desenvolver a capacidade de observación,  no propio interior e na relación que mantemos coa realidade circundante.

Recoñecer as propiedades esenciais que reúne un texto escrito (corrección, adecuación, coherencia e cohesión) e aplicalas na composición dos textos propios.

Mellorar o proceso cognitivo da lectura para unha correcta interpretación textual.

Desenvolver actitudes positivas a respecto da elaboración de borradores, así como da súa redacción e mellora.

Afondar no coñecemento interno e no dominio máis rico posíbel do idioma.

Utilizar con fluidez recursos básicos da expresión escrita como a puntuación, o estilo directo e indirecto, a modalidade oracional e as figuras retóricas máis habituais.

ACTITUDES QUE SE PROMOVERON

Valoración do feito literario como produto lingüístico, estético e sociocultural.

Afección pola lectura de textos literarios de diferentes xéneros e épocas, utilizando criterios propios de selección, interpretación e valoración.

Interese polo uso das bibliotecas e respecto polas normas que rexen a súa utilización.

Interese e gusto por transmitir as propias ideas, experiencias e sentimentos a través da creación literaria propia, explotando as posibilidades expresivas, estéticas e lúdicas da lingua.

Valoración crítica dos factores políticos, económicos e sociolingüísticos que condicionaron a evolución da literatura galega.

Respecto e valoración ante as producións literarias propias e alleas.

Interese por expresar as propias ideas, sentimentos e fantasías mediante diferentes formas literarias.

Os centros foron os seguintes: