Actividade da AELG

O escritor na súa terra: Xavier R. Baixeras. Ribadeo, 2012

2 de xuño de 2012

Coa colaboración do Concello de Ribadeo, Consellaría de Cultura, Deputación de Lugo e CEDRO

Non te vimos crecer. E nin sabemos

quen te puxo, meniña, á nosa porta,

atordoada, trémula de inzar

sombras, tristezas nas que xa non cremos,

cando só chegas tu daquela morta

rúa, abalando, lonxe do teu mar.

Unha palmeira en Ribadeo

A Homenaxe “O/A Escritor/a na súa Terra”, que cada ano impulsa a Asociación de Escritoras e Escritores en Lingua Galega (AELG), chegou neste 2012 a súa XVIII Edición recaendo, por decisión da Asemblea de Socias e Socios, na figura de Xavier Rodríguez Baixeras.

Celebramos esta XVIII edición o sábado 2 de xuño, na vila de Ribadeo, que con nós colaborou.

Programa de actos

11.30

Parque “Os Canapés” (O Xardín)

Plantación da palmeira (árbore simbólica do escritor) e descubrimento do Monólito conmemorativo dedicado ao homenaxeado

• Cesáreo Sánchez Iglesias, Presidente da AELG

• Mari Luz Álvarez Lastra, Concelleira de Cultura, Educación e Igualdade

• Xavier Rodríguez Baixeras

12.30

Salón de Plenos da Casa do Concello de Ribadeo

Acto de entrega da letra E

• Fernando Suárez Barcia, Alcalde de Ribadeo

• Mercedes Queixas Zas, Secretaria Xeral da AELG

• Cesáreo Sánchez Iglesias, Presidente da AELG

• Xosé María Álvarez Cáccamo. Laudatio

• Entrega da peza escultórica de Silverio Rivas

• Resposta á laudatio por parte de Xavier Rodríguez Baixeras

13.45

Visita ao Parque Xavier Rodríguez Baixeras (zona do Cargadeiro)

14.30

Restaurante “O Cabazo”

Xantar de Confraternidade.

Vexa aquí o cartel e o programa

en pdf.

A biografía nómade de Xavier Rodríguez Baixeras (Tarragona, 1945), o seu tránsito de habitante en diferentes cidades e países, a procura do centro estábel nalgún punto da rosa dos ventos –maiormente a Beira Norte, a Mariña, de Ribadeo a Nois–, conforman constantes existenciais que alicerzan o edificio da súa escrita, asentada sobre os símbolos da Viaxe e a Casa, arquetipos dinámicos en constante interacción complementaria.

Desde os seus inicios foi construíndo o poeta un código de singular estilo, caracterizado pola tensión das solucións formais, a perspectiva interrogante e asombrada, o exercicio dunha ollada simbólica e arquetípica que se expresa en pronuncia natural, certo efecto de estrañeza producido polo equilibrio entre a visión onírica e o deseño figurativo e o dominio absoluto das técnicas rítmicas e musicais. Xavier Rodríguez Baixeras, figura máxima da xeración poética dos 80, poeta fundamental na historia completa da Poesía, mestre de coetáneos e herdeiros, foi labrando na súa obra un dos discursos máis transcendentes e reveladores da contemporaneidade.

A singularidade da súa voz e do seu estilo procede da actitude ética e temperamental de quen mantén unha moi consciente orientación de independencia, moi afastado sempre da norma gregaria, aínda que comprometido tamén coas causas colectivas da xustiza e a fraternidade, desde a esquerda, desde o nacionalismo, sen deixarse seducir nunca polo engado do poder.