Máis alá das afinidades entre a escrita e o audiovisual, as palabras son ferramenta esencial para evocar un imaxinario. A materia seminal da escrita son as verbas, como os planos na materia audiovisual. E as afinidades amplíanse no proceso creativo, do parágrafo á escena, do capítulo á secuencia, da novela ao filme. Máis alá desa brincadeira, a ficción levada a imaxes pasa antes pola peneira dun guión, dunha harmoniosa mestura. A futura trama xermina entre unha fervenza de palabras que van collendo forma para culminar nunha pantalla ao servizo dun imaxinario colectivo, co/a lector/a mudando a espectador/a.

 

• Tivo 5 sesións de catro horas cada unha.

 

Calendario

- Días: sábados 9 e 16 de outubro; e 6, 13 e 20 de novembro.

- Horarios: de 10:00 a 14:00 h.

 

 

No desenvolvemento desta actividade aplicáronse os protocolos sanitarios vixentes en cada momento.

 

Este obradoiro foi unha experiencia gratificante no persoal, e tamén no literario.

 

Comezouse o curso cun repaso breve por todas as variantes de comunicación practicadas polo ser humano tendo imaxes como medio, desde as pinturas das covas e os petroglifos, ata a chegada do cinema e o conglomerado audiovisual en todas as súas variantes, redes sociais incluídas.

A segunda xornada consistiu na miña maneira de entender a creación literaria, moi supeditada no estilo á narrativa audiovisual: frase/plano; parágrafo/escena; capítulo/secuencia; novela/filme.

 

A terceira tocoulle á estrutura, comezando por ter un bo desenlace e despois desenvolver á inversa, así como erros a evitar, deseño de tipos e outras variantes.

Finalmente, na seguinte, comentario de textos aportados por algúns dos participantes e repaso xeral.

 

Na clausura, Ángel de la Cruz achegou con amenidade e moito saber, os segredos do guión e como un texto literario remata en imaxes, poñendo exemplos prácticos.

 

No grupo hai escritores/as de corazón, apaixonados/as da lectura e da escrita, mesmo xa con algunha traxectoria editorial. Seguro que sorprenderán cos seus textos futuros. Por moito que pretendan convencernos dun futuro aplanado polo streaming, as redes sociais e toda a parafernalia audiovisual, sempre haberá mulleres e homes con gañas de contar historias coa palabra. Quedamos amigos/as, militantes todos na República das Letras.

 

---

Información sobre protección de datos
A responsábel do tratamento é a Asociación de Escritoras e Escritores en Lingua Galega. A finalidade do tratamento é a prestación do servizo que se detalla na solicitude ou actividade organizada. A base legal do tratamento é o cumprimento dunha obriga contractual na prestación dun servizo. Os seus datos conservaranse unicamente durante os prazos de prescrición legalmente aplicábeis. Pódense comunicar os seus datos a terceiras/os organizadoras/es ou colaboradoras/es da actividade. No caso de solicitar certificado de asistencia, os seus datos comunicaranse ao/á impartidor/a da actividade. Pode acceder, rectificar, suprimir os seus datos e nos casos determinados opoñerse ao tratamento, limitar o seu uso ou portar a outra/o responsábel. Tamén pode solicitar a tutela da Axencia Española de Protección de Datos ou presentar unha reclamación ante a mesma.