Froito dun convenio de colaboración entre o Concello de Santiago e a Asociación de Escritoras e Escritores en Lingua Galega (AELG).
Carlos Negro foi o encargado de conducir o obradoiro de escrita creativa que, baixo o título "O berro de Lord Byron" pretendeu lograr que os participantes adquiriran o hábito da escritura como outra maneira de gozar do tempo libre, á vez que afondou na afección pola lectura e na valoración do feito literario como produto lingüístico, estético e sociocultural.
O Obradoiro tivo lugar no Centro Sociocultural de Conxo, comezando o sábado 27 de outubro e desenvolvéndose en dez sesións de dúas horas cada unha.
Foi un bradoiro de reflexión e creación centrado, fundamentalmente, no xénero poético, estruturado en dez apartados:
- Literatura e poesía: diso non che sei nada.
- O big-bang do universo: o berro de Lord Byron.
- Viches que pintas tan raras leva ese poema?
- Primeiro manifesto contra a cursilería poética.
- Cinco posturas para o acto poético.
- As tripas do corazón ou a fontanería da alma.
- O sangue no fouciño, a pólvora no canto.
- Temporada de caza: imaxes, obxectos, persoas.
- Morfem*s abert*s ou como rachar as costuras.
- O veleno do alacrán e o sorriso do pallaso.
Obxectivos: pasalo ben, falar de poesía, recitar versos, facer poemas, romper tópicos, aprender a desaprender o pouco que se sabe.
Vexa aquí o cartel do obradoiro.