O mércores 16 de abril tivo lugar a rolda de prensa de presentación da iniciativa #engalegoleo, na que colaboran a CRTVG, Gálix e a AELG.

O vindeiro día 23 de abril celébrase en todo o mundo o Día do Libro. Conscientes da relevancia desa data, e da importancia do libro e da lectura no conxunto da cidadanía, a Asociación de Escritoras e Escritores en Lingua Galega (AELG), xunto á Compañía de Radio Televisión de Galicia e a Asociación Galega do Libro Infantil e Xuvenil (Gálix), botan a andar unha iniciativa, a través da web da CRTVG e de Twitter que, baixo o hashtag #engalegoleo, pretende animar o conxunto da cidadanía a recomendar un libro en galego, a explicar por que lles gusta ler, que é a literatura para cada un...
En definitiva, trátase de darlle, no Día do Libro, protagonismo esencial á lectura como unha fonte de pracer e compartilo co resto dos internautas-lector@s-escritor@s que ese día queiran participar.

A páxina web de referencia é http://www.crtvg.es/especiais/dia-do-libro, pero pódese acceder a través do dominio xeral (crtvg.es) desde un banner habilitado para tal efecto.

Queremos animarvos a participar ese día e a que espalledes entre as vosas amizades e contactos esta iniciativa.