in modo antico

abolida a realidade, para que queremos mímese?

en suspenso a identidade, que necesidade tendes de expresión?

houbo un rebumbio funcional. un nordés vénnos da quebra. Hannibal ad portas, poetas.

a NeoPoética sublima a interacción, a permuta discursiva das máscaras que falan en rolda aleatoria. non importe de qué (como nun telexornal).

soubemos que a Historia era o pouso dunha intención. Só se lexitima a gorxa.

o mito substitúe por fin á trama.

 
un solsticio parásito ancorara un bucle de palabras-signo. mais agora flúen voces como ríos de inverno, como alvéolos que abrochan na pel de Marte esponxiforme.

a tarefa iniciática: redactar un dicionario, fundar sentido na metamorfose perenne de voz e referencia.

estudemos a ledicia. orcemos o rito.

a cópula conxuntiva. o tránsito.